Akhriso Faallo:- Qaraxii Soobbe Ma Halkaas Ayaa Looga Hari Doonaa?

Akhriso Faallo:- Qaraxii Soobbe Ma Halkaas Ayaa Looga Hari Doonaa?

SHARE

Muqdisho,(Samawade.so):-Soomaaliya weli sooma marin in dad ka badan 350 qof ay hal maalin oo kaliya qarax ku dhintaan,Waa dhacdo dhalisay su’aalo iyo doodo dhinacyo badan yeelatay.

50 qof ka badan ayaa weli la la’yahay. Waxaa loo tirinayaa inay dambaska ka mid noqdeen!!!

Su’aasha aan ilaa hadda jawaabta loo helin waxay tahay nooca qaraxan uu ka samaysnaa ee sidaa dadka u laayay. Ma qaraxyadii gudaha dalka lagu farsamayn jiray baa, mise waa wax nagu cusub oo ka tan weyn?
Shacabku si isku mid ah ayey uga jawaabeen, ayadoo aan loo eegin farqiyada siyaasadeed ama kala duwanaanshaha afkaarta. Meydadka la aasay mooyee waxaa jiray in dhaawacyada gurmad xoog leh loo fidiyey.
Dalal ay ka mid yihiin Turkiga, Jabuuti, Qadar, Iimaaraadka, Kenya, Itoobiya, Maraykanka iyo Suudaan ayaa dhaawacyada intoodi darnayd loo qaaday ama soo diray dhakhaatiir iyo gargaar caafimaad.
Waxaa soo baxay dhallinyaro is abaabulay oo gurmadka qayb lixaad leh ka qaatay. Waxaa la oran karaa waxay buuxiyeen kaalintii looga baahnaa kooxaha baaritaanka iyo samatabixinta oo ugu yaraan dal walba uu leeyahay si markii ay masiibo timaado ay ula tacaalaan.
Qaraxii Soobbe ma halkaas ayaa looga hari doonaa?

 Sida aan kor ku sheegay, qaraxan oo kale weli hore uma soo marin taariikhda Soomaaliya. Dad goobjoogeyaal ah waxay sheegeen in gaariga qarxay uu sameynayey guux la moodo sidii Folkaane qarxi raba, intii uu gaarigu soo cararayey isgoysyada Banaadir iyo Soobbe dhexdooda. Dhismeyaal dhagax ka samaysan, sida Hotel Safari, ayaa gebi ahaanba ilbiriqsiyo gudahood dhulka la sinmay.
Dadka aqoonta u leh waxyaabaha qarxa waxay sheegayaan in ay u badan tahay in la kordhiyey awoodda qaraxa oo ugu yaraan la horumariyey ama lagu daray waxyaabo cusub oo waxyeellada badinaya.
Madaxda dawladda Soomaaliya waxay wacad ku mareen in la soo qaban doono cid alla iyo ciddii ka dambaysay qaraxa oo aan la isaga hari doonin.
Gaarigan qarxay waxay warar aan la xaqiijinin sheegayaan in laga soo raray deegaan ka tirsan gobolka Sh/hoose.
Dhamaanba koontaroolladii uu soo maray waxaa joogay ciidamo kuwa dawladda ah oo uu si fudud kaga soo gudbay. Cabdisalaan Yuusuf Guuleed, marna noqday agaasime ku xigeenka hay’adda nabadsugidda Soomaaliya(NISA) oo iminka ka faallooda arrimaha amniga wuxuu sheegayaa in baabuurkan uu yahay mid la yaqaannay oo jidkaas mari jiray, qof la yaqaannana uu damiintay. Wuxuu kaloo sheegay in ay jiraan duruufo nololeed oo askarta ku xeeran iyo qalabkii qaraxyada lagu ogaan lahaa oo aan oollin baraha koontaroollada.
Ilo ay BBC la xiriirtay oo lagu kalsoonaan karo waxay sheegayaan in gaari kale oo isna ku qarxay xaafadda ceel qalow in yar ka dib markii uu gaariga weyn qarxay uu xiriir la lahaa, looguna tala galay in marka hore uu gaariga yar irridda bartilmaameedka qarax ku furo, si gaariga weyn uu qarax xoog leh uga gaysto.
Sida muuqata Dawladda Soomaaliya waxay samaysay baaritaan, waxayna sheegtay in ay xog hayaan, dadna loo qabtay. Ilaa hadda ma jirto tallaabo intaa dhaafsiisan.
Ma jirto cid haddii la qabtay maxkamad la soo taagay. Mana jirto xog kale oo la soo bandhigay oo ah ugu yaraan in la shaaciyo halka uu bartilmaameedku ahaa.
Cabdisalaam Yuusuf Guuleed wuxuu qabaa in qaraxaasi lagaba hortagi karay. “Anigu waan arkay farriimaha la isu dirayo oo laga digayo in gaari noocaas ah uu soo socdo. Maxaa digniintaas loo qaadan waayey waa su’aal ay tahay inay ka jawaabaan hay’adaha amniga” ayuu yiri Cabdisalaan, wuxuuna intaas raaciyey “waxaa looga hortagi karay khatartan oo kale in baabuur kasta oo noocaas ah ah laga taxadaro, la baaro, la hubiyo, ama la joojiyo”.
Baarayaasha dowladda ma sheegin in la hayay sirdoon ku saabsan weerarkan.
Dhinaca kale, dalka waxaa la galiyey 3 maalmood oo baroordiiq qaran ah.
Dagaalka Al Shabaab
Madaxweyne Maxamed C/laahi Farmaajo wuxuu ka codsaday guddoomiyeyaasha labada aqal ee baarlamaanka inuu la hadlo xildhibaannada, hase yeeshee dib ayaa loo dhigay.
Arrinta micnaha samaysay ayaa ah in Madaxweyne Farmaajo, bacdamaa uu doonayey inuu labada aqal ee baarlamaanka u jeediyo in dalka la geliyo xaalad dagaal/degdeg ah ay ku haboon tahay inuu marka hore kala tashado oo uu meel saaro kalsoonida iyo ka raalli ahaanshaha arrintaas dalalka ay Soomaaliya ciidamada ka joogaan oo cududdooda lagu tashto, markaa ka dibna uu baarlamaanka hor yimaado. Haddii uu dhanka kale ka billaabo waxaa malaha laga shakiyey in qorshuhu dhicisoobo.

Kummaana daweyne oo aragti ahaan ka mideynaa sida ay uga xunyihiin weerarkaasi dadka badan lagu xasuuqay ayaa isugu soo baxay waddooyinka waaweyn ee caasimadda Soomaaliya ee Muqdisho. waxa ay ku dhawaaqayeen erayo ay ka mid ahaayeen “Al Shabaab Dooni Meyno, Cadawga nagumaadayo mid ayaan ka nahay”.

Dadweynaha Dibadbaxayay oo isugu yimid garoonka Kubadda Cagta Banaadir Stadium waxaa kula hadlay Madaxweynaha JS Mudane Maxamed Cabdullaahi Farmaajo. Madaxweynaha wuxuu halkaasi kaga dhawaaqay dagaal cusub oo kan ah Kooxda Al Shabaab. Wuxuu faray dadweynaha in ay dagaalka kala qeybgalaan, qofkastana hubka qaato si looga guuleystay cadawga ku soo duulay dalka ee banneystay daadinta dhiigga dadka Soomaaliyeed.

Mudane Farmaajo wuxuu durba billaabay safar uu ku kala bixiyay wadamada Ciidamadoodu ay ka howlgalaan Soomaaliya, wuxuu tagay wadamada Ugandha, Kenya, Jabuuti iyo Ethiopia, isagoo kala hadlay sidii ay uga qeybqaadan lahaayeen dagaalka cusub ee uu iclaamiyay, Madaxweynaha isagoo faafhaafaahinaya natiijada socdaalka uu dalalkaas kusoo kala bixiyay wuxuu war fidiyeenada u sheegay in socdaalkiisa uu guul ku soo dhamaaday madaxdii ay wada kulmeena isku afgarteen in la qaado tallaabooyin milatari oo dalka looga Saarayo kooxda xagjirka ah ee Al Shabaab.

Xigasho BBC.

Samawade.so ayaa sii dhameystirtay Qormada.

LEAVE A REPLY